Guddoomiyaha Aqalka Sare ee Baarlamaanka JFS, Mudane Cabdi Xaashi Cabdullaahi ayaa maanta shir guddoomiyay kulanka Guddiga joogtada Aqalka Sare oo lagu ansixiyay qorshe hawleedyada Guddiyada Golaha Aqalka Sare.
Kulanka oo ay goobjoog ahaayeen Guddoomiye ku xigeenka koowaad Mudane Cali Shacbaan Ibraahim iyo Guddoomiye ku xigeenka labaad Mudane Cabdullaahi Cali Xersi (Timacadde) ayaa ugu horrayn xoghayaha guud ee Aqalka Sare, Mudane Cabdinaasir Ibraahim Guuleed, waxa uu xubnaha Guddiga joogtada u soo bandhigay una faahfaahiyay dhammaan qorshe hawleedyada Golaha iyo kuwa guddiyada Aqalka Sare ay soo diyaariyeen, si ay ugu hawlgalaan kalfadhiga todobaad ee Baarlamaanka 11-aad.
Intaas kadib, Xubnaha Guddiga joogtada oo dood iyo falanqayn dheer ka yeeshay ajandaha kulanka, ayaa sidoo kale soo jeediyay fikrado iyo talooyin ku saabsan hannaanka waajib gudshada guddiyada Aqalka Sare iyo habka jadwalaynta shuruucda Golaha horyaalla iyo sida la isku-aacsiinayo kuwa hortebinta u leh Qaranka. Waxayna meelmariyeen oo ay iskuna raaceen Ajdendayaasha kalfadhiga todobaad ee Golaha iyo Guddiyada Aqalka Sare.
Guddoomiye Cabdi Xaashi oo kulanka soo xiray ayaa xubnaha guddiga joogtada Aqalka Sare uga mahadceliyay diyaar garoowgooda ku aaddan arrimaha islaxisaabtanka, korjoogtaynta iyo doodihii kale oo miro-dhalka ahaa ee ay soo jeediyeen, isagoo kula dardaarmay in ay sii laba jibbaaraan shaqada ay Qaranka Soomaaliyeed u haayaan.
