Ku-Simaha Guddoomiyaha ahna Guddoomiye Ku xigeenka koowaad ee Aqalka Sareee Baarlamaanka Jamhuuriyadda Federaalka Soomaaliya Mudane Cali Shacbaan Ibraahim, ayaa maanta daah furay kulan dhageysi dadwaynaha oo ku saabsan Hindise Sharciyeedka kaalmo sharciyeedka federaalka, oo ay soo qaban qaabiyeen Guddiga Garsoorka, Cadaaladda, Arrimaha Diinta, Awqaafta, Xaquuqul Insaanka, Haweenka iyo Caruurta Aqalka Sare.
Ku simaha Guddoomiyuhu wuxuu dul istaagay muhiimadda uu sharcigan u leeyahay dadka Soomaaliyeed gaar ahaan dadka u baahan kaalmo sharciyeed iyagoon awoodin in ay qabsadaan qareen u dooda xuquuqdooda, isla markaana ku booriyey ka soo qayb galayaasha in ay ku biiriyaan aragtidooda hindisesharciyeedka, wuxuuna tilmaamay muhiimadda uu sharcigan u leeyahay dadka Soomaaliyeed ee danyarta ah ee aan haysan u qareemid sharciyeed.
Intaas ka dib, waxaa la guda-galay dhageysiga dadweynaha iyo aragtiyahooda iyagoo ka doodday islamarkaana dul istaagay cutub iyo qodob walba oo uu hindise sharciyeedka ka kooban yahay, iyadoo mid mid loo diiwaan-galiyey dhamman sojeedinnadii ay soo jeediyeen qaybaha kala duwan ee bulshada oo ay ku jiraan hay’adaha iyo xafiisyada qaabilsan howlaha caddaalada iyo garsoorka, oo soo bandhigay aragtiyo wax ku ool ah, wax-ka-beddel, wax ku daris iyo siiqayn intaba.
