Xoghaye ku xigeenka Aqalka Sare ee Baarkamaanka JFS Mudane Cabdullahi Xaaji Geedi, ayaa ka qayb galay shirka sanadlaha ah ee Ururka Xoghayayaasha Guud ee Baarlamaannada Afrika (ASGAP) kaas oo ka dhacay magaalada Midrand, Koonfur Afrika.
Shirka oo sanadkiiba mar la qabto ayaa sanadkaan waxaa diiradda lagu saaray doorashada hoggaanka ururka, kaalinta Afrika ee diblomaasiyadda, adkaynta xiriirka Golayaasha Baarlamaannada Afrika si loo fuliyo go’aannada iyo Qaraarrada kasoo baxay Midowga Afrika iyo sidoo kale warbixin kooban oo ku saabsan shir madaxeedka Baarlamaannada P20 ee a dhici doona Cape Town horaanta bisha Oktoobar ee sanadkan, iyadoo ay xubnuhu ka doodeen kaalinta Afrika ee xiriirrada Baarlamaannada Adduunka.
Xoghaye Geedi, ayaa ka mahad celiyay in mar kale Baarlamaanka Jamhuuriyadda Federaalka Soomaaliya loogu doortay xubin ka noqoshada Guddiga fulinta ee Ururka Xoghayayaasha Guud ee Baarlamaannada Afrika (ASGAP), isagoo tilmaamay in Baarlamaanka Federaalka Soomaaliya uu kaalin muuqata oo wax ku ool ah ka qaadan doono Fulinta Ajendayaasha horyaalla ururka.
