Guddoomiyaha Aqalka Sare ee Baarlamaanka Jamhuuriyadda Federaalka Soomaaliya Mudane Cabdi Xaashi Cabdullaahi oo ay wehelliyaan ku xigeennadiisa ayaa maanta soo agaasimay munaasabad lagu abaal marinayey Sanatarrada iyo guddi-hoosaadyada Golaha ee muujiyey howlkarnimada dheeraadka ah, inta lagu guda jiray kalfadhigii 5-aad ee Baarlamaanka 11-aad.
Munaasabadda abaalmarinta oo ay goobjoog ahaayeen xubnaha Sanatarrada Golaha, ayaa si gaar waxaa loogu abaalmariyay Sanatarradii ugu imaanshaha iyo wakhti ilaalinta badnaa Kalfadhiga 5aad, waxaana abaalmarinta koowaad ee Sanatarrada ugu imaashaha badnaa kalfadhiga shanaad la siiyay saddex Sanatar oo kala ah Sanatar Samsam, Sanatar Cabdiwali Maxamed Ibraahim (Xaabsade) iyo Sanatar Deeqa Xasan Xuseen.
Abaalmarinta labaad: qiimaynta Guddiyada Golaha ee ugu shaqada badnaa Kalfadhiga 5-aad, waxaana la guddoonsiiyey, Guddiga Guddiga Arrimaha Gudaha iyo dib u heshiisiinta, Guddiga Maaliyadda iyo Dhaqaalaha, iyo Guddiga Arrimaha Bulshada, waxaa sidoo kale Guddiga Haweenka la guddoonsiiyay billad sharaf gaar ah oo ku saabsanayd u qareemidda arrimaha Haweenka iyo qalabaynta xafiisyada ay ku howl galaan.
Ugu dambayn gunaanadka Munaasabadda Guddoomiyaha Aqalka Sare ee Baarlamaanka JFS Mudane Cabdi Xaashi Cabdullaahi oo mid mid billadaha iyo shahaado sharafta u guddoonsiiyay Sanatarrada iyo xubnaha Guddiyadii ugu shaqada badnaa kalfadhiga 5-aad ee Aqalka Sare, ayaa ku bogaadiyay waajib gudashadooda shaqada ay Qaranka u hayaan, wuxuuna dhinaca kale ku booriyay xubnaha kale ee Sanatarrada in ay shaqadooda ku bixiyaan dadaal iyo waqti dheeraad ah oo ku saabsan howlaha isla-xisaabtanka iyo korjoogtaynta ee hay’adaha Dowladda.
