Guddiga Amniga iyo Difaaca Aqalka Sare ee Baarlamaanka Jamhuuriyadda Federaalka Soomaaliya oo soo qaban qaabiyey tababar lagu xoojinaayo fahamka guud ee masuuliyadaha iyo waajibaadka shaqo ee Guddiga Amniga iyo Hay’addaha Amniga Gudaha XFS.
Tababarka waxaa furay Sanatar Col. Axmed Maxamed Cali ( Afcadey ), Tababarkaas oo socon doonna muddo laba maalmood ah. Sanatarka ayaa ka hadlay muhiimada uu u leeyahay tababarkani hay’addaha kala duwan ee ka shaqeeya amniga gudaha loona baahan yahay in kor loo qaado fahamka guud ee waajibaadka shaqo ee Baarlamaanka iyo hay’addaha amniga, Iyadoo la dardar galinaayo sharaxaadna laga bixinayo sharciyada amniga khuseeya isla markaana kor loo qaado samaynta hannaan isla-xisaabtan hufan oo ku salaysan dastuurka KMG ah, xeerarka Dalka iyo ilaalinta xuquuqda muwaadiniinta soomaaliyeed.
Intaas ka dib, Waxaa la guda’galay dood ku saabsan kaalinta shaqo ee ay leeyihiin hay’addaha Amniga, Iyadoo la soo bandhigay warbixinno iyo aragtiyo wax ku ool ah oo ay soo jeediyeen ka soo qayb galayaasha tababarka isla markaana la wadaagay guddiga muhiimadda ay leedahay qabashada tababarrada noocan oo kala ah, loona baahanyahay in sare loo qaado kala xadaynta shaqooyinka Baarlamaanka iyo hay’addaha fulinta amniga ee xukuummadda Federaalka Soomaaliya.
Dhanka kale Sanatar Afcadey ayaa ka soo qayb galayaasha tababarka u sheegay in tababarkani uu yahay aqoon iswaydaarsi iyo kor u qaadista xirfadaha ay ka soo qayb galayaashu uga baahan yihiin inay gutaan waajibaadkooda qaran.
