Guddoomiyaha Aqalka Sare ee Baarlamaanka Jamhuuriyadda Federaalka Soomaaliya Mudane Cabdi Xaashi, ayaa maanta xafiiskiisa ku qaabilay Danjiraha cusub ee Midowga Yurub u fadhiya Soomaaliya Danjire Francesca Di Mauro oo ay wehlinayso ku xigeenkeeda arrimaha siyaasadda ee marwo Karin Gatt-rutter.
Guddoomiyaha iyo Danjiraha ayaa ka wada hadlay xoojinta arrimaha iskaashiga iyo xiriirka u dhexeeya Soomaaliya iyo Midowga Yurub gaar ahaan dhinacyada horumarinta arrimaha siyaasadda, shuruucda, dib u eegista dastuurka iyo sidoo kale qorshayaasha kale ee mudnaanta u leh Aqalka Sare ee Baarlamaanka JFS.
Guddoomiyaha oo si diirran u soo dhaweeyay danjiraha, ayaa ka warbixiyay howlaha shaqo ee horyaalla Aqalka Sare iyo shuruucda muhiim u ah dib-u-dhiska dalka iyo dowlad wanaagga oo ay gacanta ku hayaan kuwaas oo ay ugu horreeyaan dhammaystirka cutubyada harsan ee Dastuurka KMG ah.
Danjire Di Mauro, oo dhankeeda Guddoomiyaha uga mahadcelisay soo dhaweyntiisa diirran, ayaa bogaadisay dadaallada Golaha Aqalka Sare ee ku aaddan ansixinta shuruucda muhiimka ah ee dowlad-dhiska Soomaaliya. Waxayna xaqiijisay in Midowga Yurub uu diyaar u yahay inuu si dhow ula shaqeeyo Dowladda Federaalka Soomaaliya, si loo xoojiyo taageerada siyaasadeed iyo tan farsamo ee lagu garab istaagayo geeddi-socodka dowlad-dhiska Soomaaliya.
