Guddiga Haweenka Aqalka Sare ee Baarlamaanka Jamhuuriyadda Federaalka Soomaaliya oo safar shaqo ku jooga magaalada Kigali ee dalka Ruwanda, ayaa soo gebagebeeyay booqashooyinkoodii iyo kulamo khibrad wadaag oo ay la soo qaateen masuuliyiin ka tirsan xafiisyada kala duwan ee dalkaas.

Safarka Xubnaha Guddiga oo qaatay muddo lix maalin ah ayay isla wadaageen masuuliyiintii ay la kulmeen warbixinno xagga shaqada ah, iskaashiga dhinacyada khibrad wadaagga, sharci dejinta, habka ilaalinta xuquuqda Haweenka iyo sida looga kabsan karo qabyaaladda, is nacaybka iyo ka hortagidda dagaallada ku salaysan qabyaaladda.

Xubnaha Guddiga ayaa booqashadooda rasmi ah ee ay ku joogeen dalka Ruwanda, waxay ku soo gebagebeeyeen xarunta horumarinta dhaqaalaha Haweenka iyo goob horumarin iyo garab istaag loogu sameeyo Haweenka ay ragoodii ku geeriyoodeen colaadihii sababay xasuuqii ka dhacay dalka Ruwanda.