Guddiga Khayraadka Qaranka, Kaabayaasha Dhaqaalaha iyo Gaadiidka ee Aqalka Sare ee Baarlamaanka Jamhuuriyadda Federaalka Soomaaliya, iyagoo gudanaya waajibaadkooda shaqo, ayaa maanta xafiiskooda ugu yeeray Wasiir-ku-xigeenka Wasaaradda Deegaanka iyo Isbeddelka Cimilada ee XFS, Mudane Xuseen Cali Xaaji, iyo xubno kale oo ka socday Wasaaradda.
Ajendaha kulanka ayaa ahaa in Wasiir-ku-xigeenka iyo masuuliyiinta Wasaaradda ay ka jawaabaan su’aalo dheeraad ah oo xubnaha Guddigu ka qabeen Hindise-Sharciyeedka Dhisidda Hay’adda Adeegga Saadaasha Hawada iyo Cimilada, iyo in faahfaahin, fasiraad iyo sharraxaad dheeraad ah laga bixiyo qodobbada qaar ee hindise-sharciyeedka.
Wasiir-ku-xigeenka Wasaaradda Deegaanka iyo Isbeddelka Cimilada, Mudane Xuseen Cali Xaaji, iyo xubnihii kale ee la socday ayaa si faahfaahsan uga jawaabay su’aalihii iyo qodobadii ay xubnaha Guddigu wax ka weydiiyeen hindise-sharciyeedka, iyagoo sidoo kale bixiyay fasiraad iyo sharraxaad dheeraad ah oo ku saabsan qodobbadii kale ee Guddigu u baahday in laga caddeeyo.
Sanatar Saynab Ismaaciil Maxamed, oo kulanka shir-guddoominaysay, ayaa uga mahadcelisay masuuliyiinta Wasaaradda Deegaanka iyo Isbeddelka Cimilada sida ay uga jawaabeen su’aalihii Guddiga iyo faahfaahinta ay ka bixiyeen qodobbada hindise-sharciyeedka, iyadoo tilmaantay in kulamada iyo wadatashiyada noocan ah ay muhiim u yihiin hubinta in qodobbada sharcigu noqdaan kuwo si cad loo qeexay, la fahmi karo, isla markaana waafaqsan baahida, duruufaha iyo danta guud ee Qaranka.
