Guddoomiyaha Aqalka Sare ee Baarlamaanka Federaalka Soomaaliya, Mudane Cabdi Xaashi Cabdullaahi, oo ay weheliyaan Guddoomiye Ku-xigeenka Koowaad Mudane Cali Shacbaan Ibraahim iyo Guddoomiye Ku-xigeenka Labaad Mudane Cabdullaahi Cali Xersi Timacadde ayaa maanta shir-guddoomiyey Kalfadhiga 8-aad, Kulankiisa 3-aad, kaas oo ajandihiisu ahaa Akhrinta Labaad ee Hindise Sharciyeedka Dib-u-eegista Sharciga La-dagaallanka Burcad-badeedda iyo Ka-hortagga Afduubka.
Ugu horreyn, Senator Saciid Cabdi Xuseen (Cawke), oo ka tirsan Guddiga Garsoorka, ayaa Golaha la wadaagay warbixinta Akhrinta Labaad ee Hindise Sharciyeedka, isagoo si faahfaahsan u dul istaagay qodobadii iyo farqadihii lagu sameeyey wax-ka-beddelka, toosinta, sixidda iyo habaynta.
Kaddib, Senatorrada Aqalka Sare ayaa si rasmi ah u guda galay ka-doodista Hindise Sharciyeedka Dib-u-eegista Sharciga La-dagaallanka Burcad-badeedda iyo Ka-hortagga Afduubka, iyagoo soo jeediyay aragtiyo, talooyin iyo wax-ka-beddello la xiriira sidii sharciga loo sixi lahaa, loona waafajin lahaa baahiyaha iyo duruufaha jira, si loo xoojiyo la-dagaallanka burcad-badeedda iyo ka-hortagga afduubka.
