Madaxweynaha Jamhuuriyadda Federaalka Soomaaliya, Mudane Xasan Sheekh Maxamuud, ayaa maanta si rasmi ah u furay Kalfadhiga Sideedaad ee Baarlamaanka Jamhuuriyadda Federaalka Soomaaliya. Fadhiga furitaanka waxaa si wadajir ah u guddoomiyay Guddoomiye Ku-xigeenka Koowaad ee Aqalka Sare, Mudane Cali Shacbaan Ibraahim, iyo Sii hayaha Guddoomiyaha Golaha Shacabka ahna Guddoomiye Ku-xigeenka Koowaad ee Golaha Shacabka, Marwo Sacdiyo Yaasiin Xaaji, iyadoo ay garab joogeen Guddoomiye Ku-xigeennada Labaad ee labada Aqal, Mudane Cabdullaahi Cali Xersi (Timacadde) iyo Mudane Cabdullaahi Cumar Abshirow.
Waxaa sidoo kale munaasabadda ka qeyb galay Ra’iisul Wasaaraha Xukuumadda Federaalka Soomaaliya, Mudane Xamse Cabdi Barre, Guddoomiyaha Maxkamadda Sare, Mudane Baashe Yuusuf Axmed, Guddoomiyaha Gobolka Banaadir iyo xubno ka tirsan Golaha Wasiirrada iyo masuuliyiin kale oo ka tirsan dowladda.
Khudbadda furitaanka waxaa ugu horreyn jeediyay Guddoomiye Ku-xigeenka Koowaad ee Aqalka Sare, Mudane Cali Shacbaan Ibraahim, oo ka bixiyay waxqabadkii Golaha Aqalka Sare intii uu socday Kalfadhigii Toddobaad. Wuxuu xusay in Goluhu meel mariyay sagaal sharci oo muhiim u ah horumarinta dowlad-dhiska iyo maamulka dalka, kuwaas oo taabanaya dhinacyada maamulka, maaliyadda, caddaaladda, caafimaadka iyo adeegyada bulshada.
Guddoomiyuhu wuxuu sidoo kale tilmaamay in Aqalka Sare uu sii xoojiyay kaalintiisa matalaadda danaha Dowlad-Goboleedyada xubnaha ka ah Dowladda Federaalka Soomaaliya iyo ilaalinta nidaamka Federaalka ah, isaga oo adkeeyay muhiimadda iskaashiga iyo wada shaqeynta heerarka kala duwan ee dowladda.
Dhanka kale, Guddoomiye Cali Shacbaan ayaa sheegay in Kalfadhiga Sideedaad uu Golaha Aqalka Sare xoogga saari doono dhammaystirka sharciyada qabyada ah iyo kuwa horyaalla Golaha, xoojinta xiriirka iyo wada shaqeynta Dowladda Federaalka iyo Dowlad-Goboleedyada, sare u qaadidda isla-xisaabtanka hay’adaha dowladda, iyo hubinta ku dhaqan galka Dastuurka iyo sharciyada kale ee dalka.
