Guddoomiyaha Aqalka Sare ee Baarlamaanka Federaalka Soomaaliya, Mudane Cabdi Xaashi Cabdullaahi, oo ay weheliyaan Guddoomiye Ku-xigeenka Koowaad, Mudane Cali Shacbaan Ibraahim, iyo Guddoomiye Ku-xigeenka Labaad, Mudane Cabdullaahi Cali Xersi Timacadde, ayaa maanta shir-guddoomiyey Kalfadhiga 8-aad, Kulankiisa 4-aad oo andihiisu ahaa Akhrinta Labaad ee Hindise Sharciyeedka Macdanta Jamhuuriyadda Federaalka Soomaaliya.
Kulanka oo kooramkiisu ku furmay 29 Sanatar, ayaa ugu horreyn Guddoomiyaha Guddiga Khayraadka Qaranka ee Aqalka Sare, Sanatar Saynab Ismaaciil Maxamed, waxa ay Sanatarrada Golaha la wadaagtay warbixinta Akhrinta Labaad ee Hindise Sharciyeedka Macdanta. Guddoomiyuhu waxay si faahfaahsan uga warbixisay wax-ka-beddellada, toosinta iyo sixitaanka lagu sameeyey hindise sharciyeedka, iyo sidoo kale hannaanka latashiyada ay Guddigu soo mareen muddadii ay gacanta ku hayeen dib-u-eegista sharciga Macdanta.
Warbixinta Guddiga kaddib, Sanatarrada Aqalka Sare ayaa guda galay ka doodista Hindise Sharciyeedka Macdanta Jamhuuriyadda Federaalka Soomaaliya, iyagoo soo jeediyey aragtiyo, talooyin iyo fikrado wax-ku-ool ah oo la xiriira sixitaanka iyo dhammaystirka sharciga.
Wasiir Ku-xigeenka Wasaaradda Batroolka iyo Khayraadka Macdanta ee Jamhuuriyadda Federaalka Soomaaliya, Mudane Cabdiwahaab Cabdi Cumar, oo kulanka maanta goob-joog ka ahaa, ayaa ka jawaabay su’aalo ay Sanatarrada qaar ka waydiiyeen Hindise Sharciyeedka Macdanta. Wasiirku wuxuu sidoo kale si faahfaahsan uga hadlay muhiimadda uu sharcigani u leeyahay dalka iyo waxtarka uu ku yeelan karo horumarinta, dhaqaalaha iyo ka faa’iidaysiga khayraadka macdanta ee Jamhuuriyadda Federaalka Soomaaliya.
