𝐆𝐔𝐃𝐃𝐈𝐆𝐀 𝐆𝐀𝐑𝐒𝐎𝐎𝐑𝐊𝐀 𝐀𝐐𝐀𝐋𝐊𝐀 𝐒𝐀𝐑𝐄 𝐎𝐎 𝐆𝐔𝐃𝐀𝐆𝐀𝐋𝐀𝐘 𝐀𝐊𝐇𝐑𝐈𝐍𝐓𝐀 𝐒𝐇𝐀𝐑𝐂𝐈𝐆𝐀 𝐈𝐋𝐀𝐀𝐋𝐈𝐍𝐓𝐀 𝐗𝐔𝐐𝐔𝐔𝐐𝐃𝐀 𝐍𝐀𝐀𝐅𝐀𝐃𝐀 𝐐𝐀𝐑𝐀𝐍𝐊𝐀 𝐒𝐎𝐎𝐌𝐀𝐀𝐋𝐈𝐘𝐄𝐄𝐃.

Guddiga Garsoorka, Arrimaha Diinta iyo Awqaafta, Xaquuqul Insaanka, Haweenka iyo Caruurta Aqalka Sare ee Baarlamaanka Jamhuuriyadda federaalka Soomaaliya, oo gudanaya waajibaadkooda shaqo. ayaa maanta yeeshay kulankooda 3-aad ee kalfdhiga shanaad.

Kulanka oo ay shir guddoominaysay Guddoomiyaha Guddiga Sanatar Naciima Xasan Gadhwayne, ayay xubnaha guddigu, waxa ay falanqayn iyo dulmar guud ku sameeyeen Hindise sharciyeedka ilaalinta xuquuqda naafada Qaranka, si ay uga waajib gutaan, iyaga oo maraya hannaankii latashiyada dadwaynaha iyo dadka baahiyaha gaarka ah qaba.

Guddoomiyaha Aqalka Sare ee Baarlamaanka Jamhuuriyadda Federaalka Soomaaliya Mudane Cabdi Xaashi Cabdullaahi, wuxuu maanta xafiiskiisa ku qaabilay Danjiraha Qatar u fadhiya Soomaaliya, Mudane Dr. Cabdallag Bin Saalim Alnuceymi

Guddoomiyaha iyo Safiirku ayaa ka wada hadlay adkaynta xiriirka Soomaaliya iyo Qadar, arrimaha bani’aadannimada, iyo iyo dardar galinta taageerada dhinacyada horumarinta Soomaaliya gaar ahaan deegaannada Dowladaha xubnaha ka ah Dowladda Federaalka Soomaaliya.

Sidoo kale safiirku wuxuu ballan qaaday inuu ka shaqayn doono in xiriir toos ah ay wada yeeshaan Baarlamaanka Jamhuuriyadda Federaalka Soomaaliya iyo Golaha Shuurada Dowladda Qadar, si ay isu waydaarsadaan khibrada shaqo, sharci dajin iyo korjoogtayn.

Guddoomiyaha Aqalka Sare ee Baarlamaanka Jamhuuriyadda Federaalka Soomaaliya Mudane Cabdi Xaashi Cabullaahi wuxuu tacsi tiiraanyo leh u dirayaa qoyska, qaraabada, ehelada iyo dhammaan ummadda Soomaaliyeed gaar ahaan bahda Fanaaniinta Soomaaliyeed geeridii xanuunka badnayd ee ku timid Alle ha u naxariistee, Siteey Maxamed Nuur (Sitey Manoogto) oo muddo dheer ka mid ahayd hobollada Waabari, maantana ku geeriyooday magaalada Muqdisho.

Guddoomiyaha wuxuu xusay in Marxuumaddu ay ahayd Fannaanad wayn, jilaa iyo majaajilayste caan ku ah cayaaraha Hiddaha iyo dhaqanka (Falkaloorka) dadkeeda u soo adeegatey muddo dheer, gaar ahaan dhinacyada fanka, suugaanta, cayaaraha hiddaha iyo dhaqanka nabadda iyo horumarinta dhaqanka Soomaaliyeed, waxayna ka mid ahayd Fannaaniintii Qaranka ee dalkeenna u soo hooyay billado, door lama illaawaan ah ka soo qaadatay nabadda iyo wacyigelinta bulshada Soomaaliyeed.

Marxuumaddu waxay kaalin lama illaawaan ah ku lahayd in magaca iyo fanka Soomaaliyeed uu caan noqdo, fanka iyo suugaanta Soomaaliyeedna laga daawado isla markaana laga xiiseeyo masraxyada iyo tiyaatarrada caalamka iyo Gudahaba.

Guddoomiye Cabdi Xaashi wuxuu Marxuumadda Alle uga baryey in uu hoygeeda ka yeelo Jannatul Fardowsa, samir iyo iimaanna uu ka siiyo qoyska, ehelada iyo guud ahaan ummadda Soomaaliyeed ee ay ka geeriyootay.

INNAA LILAAHI WA INNAA ILEYHI RAAJICUUN.

Guddiyada Maaliyadda labada Gole ee Baarlamaanka JFS, oo gudanaya waajibaadkooda Dastuuriga ah, ayaa maanta kulan wadajir ah oo ay yeesheen ayaa ugu yeeray Masuuliyiinta Wasaaradda Caafimaadka iyo Daryeelka Bulshada XFS

Kulanka oo ay wadajir shir guddoomiyey Guddoomiye ku xigeenka Guddiga Maaliyadda Aqalka Sare Sanatar Ibrahim Awgaab iyo Guddoomiyaha Guddiga Maaliyadda Golaha Shacabka Xildh. Maxamed Farax Nuux, ayaa Wasiirka Caafimaadka, Wasiir ku-xigeenka iyo xubnaha kale ee la socday ka dhagaystay warbixin ku saabsan howlaha wasaaradda gaar ahaan arrimaha mashaariicda caafimaafka, sida loo fuliyo, daah-furnaanta hannaannka loo maamulo iyo miro-dhalka mashaariicdaas.

Wasiirka Wasaaradda Caafimaadka iyo Daryeelka Bulshada XFS Mudane Dr Cali Xaaji ayaa mid mid uga Jawaabay su’aalihii xubnaha Guddiyada Maaliyadda labada aqal, iyadoo Wasiirka lagu booriyay in uu dardar gelinto mashaariicda caafimaadka, si daahfurna oo loo siman yahayna loo maamulo, si loo gaaro miro-dhalka horumarinta arrimaha caafimaadka.

Guddiga Khayraadka Qaranka, kaabayaasha Dhaqaalaha iyo Gaadiidka Aqalka Sare, ayaa maanta xafiiskooda ugu yeeray Wasiirka Wasaaradda Deegaanka iyo isbadalka Cimillada XFS Khadiijo Maxamed Al-makhsuumi iyo masuuliyiin kale oo la socday.

Xubnaha Guddiga Khayraadka Qaranka Aqalka Sare oo gudanaya waajibaadka ka saran kor-joogtaynta iyo la xisaabtanka Hay’adaha Dowladda ayaa kulanka ay maanta la qaateen Masuuliyiinta Wasaaradda Deegaanka iyo isbaddalka Cimillada, waxaa la isku dhaafsaday waydiin odhaaheedyo iyo warbixinno ku saabsan howlaha shaqo ee Wasaaradda, iyadoo xubnaha guddigu ay si gaar ah wax uga waydiiyeen Wasiirka dhinacyada jarista dhirta, qorshaha yaraynta qaaca, dhibaatada shucaaca anteenooyinka, jarista dhirta, qorshaha yaraynta qaaca, dhibaatada shucaaca anteenooyinka, xirirka dowlad goboleedyada iyo su’aalo kale oo muhiim ahaa, kuwaas oo ay Wasiirku si faahfaahsan xubnaha Guddiga ugu jawaabay dhammaan waydiin odhaaheedyadii.

Guddoomiyaha Guddiga Khayraadka Qaranka Aqalka Sare Sanatar Saynab Ismaaciilr oo kulanka Shir gudoominayay ayaa Massuliyiinta Wasaaradda Deegaanka iyo isbadalka Cimillada uga mahad celiyay sida faahfaahsan oo ay warbixinta uga siiyeen howlaha Wasaaradda, ugu danbaynna la isku afgartay in si dhow loo wada shaqeeyo, si loo dardar geliyo howlaha baaxadda leh ee loo hayo dadka iyo dalka Soomaaliya.

Guddoomiyaha Aqalka Sare ee Baarlamaanka Jamhuuriyadda Federaalka Soomaaliya Mudane Cabdi Xaashi Cabdullaahi oo uu weheliyo Guddoomiye ku xigeenka labaad, Mudane Cabdullaahi Cali Xersi (Timacadde) ayaa maanta shir guddoomiyay kalfadhiga shanaad kulankiis 14-aad oo ajandihiisu ahaa Akhrinta koowaad ee Hindise Sharciyeedka Ilaalinta Xuquuqda Naafada Qaranka Soomaaliyeed.

Wasiirka Wasaaradda Qoyska iyo Xuquuqul Insaanka XFS Bashiir Maxamed Jaamac, ayaa Sanatarrada Aqalka Sare ee Baarlamaanka Jamhuuriyada Federaalka Soomaaliya ka hor akhriyay Hindise Sharciyeedka Ilaalinta Xuquuqda Naafada Qaranka, isla markaana wuxuu faahfaahiyay muhiimiyadda uu leeyahay Hindise Sharciyeedkan iyo sida uu u ilaalinayo Xuquuqda Naafada Soomaaliyeed.

Intaas ka dib, Guddoomiye Cabdi Xaashi oo kulanka soo xiray, ayaa Guddiga Garsoorka, Cadaalada, Arimaha diinta, Awqafta, Xuquuqul Insaanka, Haweenka iyo Caruurta Aqalka Sare, wuxuu faray inay la wareegaan Hindise Sharciyeedka Ilaalinta Xuquuqda Naafada Qaranka Soomaaliyeed, kana soo gutaan waajibaadka dastuuriga ah ee saaran, isla markaana fadhiga guud ee Golaha ay dib ugu soo celiyaan, si Goluhu uga guto waajibkiisa Dastuuriga ah.

Guddoomiyaha Aqalka Sare ee Baarlamaanka Jamhuuriyadda Federaalka Soomaaliya, Mudane Cabdi Xaashi Cabdullaahi oo xafiiska ku qaabilay Guddoomiyaha Baarlamaanka Dowlad Goboleedka Jubbaland, Mudane Sheekh Cabdi Maxamed Cabdiraxmaan iyo xubno kale oo la socday.

Guddoomiye Cabdi Xaashi ayaa ka dhagaystay guddoomiyaha Golaha Wakiilada Jubbaland warbixin guud oo ku saabsan howlaha Baarlamaanka Dowlad Goboleedka Jubbaland, xaaladda siyaasadeed iyo bulsho ee Dadwaynaha ku dhaqan deegannada Dowladda Jubaland, iyagoo sidoo kale ka wada hadlay xoojinta xirirka shaqo labada hay’adood ee Aqalka Sare iyo Golaha Wakiillada Jubaland iyo sidii looga wada shaqayn lahaa arrimaha hortebinta leh ee waajib gudashada Golayaasha Baarlamaanka heer Federaal iyo heer Dowlad Goboleed.

Guddiga Maaliyadda Labada Aqal Baarlamaanka Jamhuuriyadda Federaalka Soomaaliya ayaa maanta kulan isla xisaabtan ah la qaateen Hantidhowraha Qaranka Mudane Axmed Ciise Guutaale, waxayna ka dhagaysteen warbixin ku saabsan arrimaha baarista maaliyadda iyo caqabadaha jira dhanka kale xubnaha labada guddi ayaa su’aalo waydiiyey masuuliyiinta hanti dhowrka oo u horeeyo hantidhowraha guud ee qaranka.

Intaas ka dib guddiga maaliyadda labada Aqal ee Baarlaamanka ayaa galinkii dambe maanta kulan la qaatay Xisaabiyaha guud ee dalka Mudane Cabdiraxmaan Maxamed Anas iyo xubno kale oo la socday.

Xubnaha guddiyada maaliyadda labada aqal ee Baarlamaanka JFS ayaa Xisaabiyaha guud, waxay ka dhagaysteen warbixinno ku saabsan mashaaricda dalka, halka ay marayaan, caqabadaha haysta iyo waydiimo kale oo ku saabsan doorka shaqadooda ee xafiiskooda.

Ku-simaha Guddoomiyaha ahna Guddoomiye ku xigeenka koowaad ee Aqalka Sare, Mudane Cali Shacbaan Ibraahim oo uu weheliyay Guddoomiyaha Golaha Shacabka Mudane Sh. Aadan Maxamed Nuur “Madoobe”, ayaa maanta si rasmi ah u daahfuray wajiga 2aad ee Barnaamijka Danabaysan ee Latashiga Dadweynaha ee Dib-u-eegista cutubyada 5-9 ee Dastuurka.

Barnaajimkan ayaa siinaya fursad aad u weyn dhammaan muwaaddiniinta soomaaliyeed meel kasta ay joogaan in ay uga soo aragti dhiibtaan dib-u-eegista dastuurka gaar ahaan cutubyada 5aad, 6aad, 7aad, 8aad iyo 9aad oo hadda Guddiga Madaxabannaan ee Dib-u-eegista iyo Hirgelinta Dastuurka uu ka shaqeenayo.

Senator Siciid Cawke oo ah Xoghayaha Guddiga Lasocodka ayaa ku dhiirigeliyey in muwaadinkasta oo uu ka soo aragti dhiibto cutubyada la diyaarinayo ee wax-kabeddelka Dastuurka.

Intaas ka dib Guddoomiyaha Guddiga Madaxa-bannaan Avv. Burhan Adan Omar ayaa guddoonka labada aqal iyo bulshada soomaaliyeedba u sharaxay barnaamijka oo muhiim u ah dhammaan muwaaddiniinta soomaaliyeed, fursadna ay tahay ka aragti dhiibashadooda ku aaddan cutubyada hadda la diyaarinayo.

Guddoomiyaha Aqalka Sare ee Baarlamaanka Jamhuuriyadda Federaalka Soomaaliya Mudane Cabdi Xaashi Cabdullaahi oo maanta dalka dib ugu soo laabtay, ayaa si diiran loogu soo dhoweeyay garoonka diyaaraha Caalamiga ah ee Aadan Cadde ee magaalada Muqdisho.

Gddoomiyaha oo safar caafimaad dalka dibaddiisa ugu maqnaa ayaa garoonka Adan Cadde waxaa ku soo dhoweeyay Guddoomiye ku xigeenka koowaad ee Aqalka Sare Mudane Cali Shacbaan Ibraahim iyo Guddoomiye ku xigeenka labaad ee golaha Shacabka Mudane Cabduullaahi Cumar Abshirow, Madaxwaynihii hore ee dalka Mudane Sheekh Shariif Sheekh Axmed, Ra’uusul Wasaare ku xigeenkii hore ee dalka Mahdi Maxamed Guuleed, Sanatarro, Xildhibaanno iyo marti sharaf kale.

Guddoomiyaha oo hadal kooban jeediyay ayaa adkeeyay kaalinta Baarlamaanka Federaalka Soomaaliya ee midnimada iyo wada jiroa Dalka Soomaaliya, wuxuuna sheegay in Soomaaliya ay leedahay khayraad dihan oo aad u faro badan; si looga faa’iidaystana ay lagama maarmaan tahay in la helo nabad, midnimo iyo isku duubni.

Guddoomiye Cabdi Xaashi oo ka mahad celiyay soo dhowaynta diiran ee loo sameeya, ayaa xusay in uu ka tiiraanyaysan yahay shaqaaqada iyo dhiilooyinka colaadaha ka dhax aloosan dadka walaalaha ah ee wada dega deegaanno iyo degmooyin ka tirsan dalka, isagoo ugu baaqay midnimo, isku-duubni, wadajir iyo walaaltinimo, isla markaana ay tahay in laga heshiiyo wixii la isku khilaafsan yahay.

Guddoomiye ku xigeenka labaad ee Aqalka Sare, Mudane Cabdullaahi Cali Xersi (Timacadde), ayaa maanta shir guddoomiyay kalfadhiga shanaad kulankiisa 13-aad oo ajandihiisu ahaa siiwadista doodda wax ka beddelka Xeer-hosaadka Aqalka Sare.

Doodda Sanatarrada ee wax ka beddelka Xeer-hoosaadka Aqalka Sare oo si gaar ah maanta loo dul istaagay qodobada ugu muhiimsan Xeer-hoosaadka ayay ku soo bandhigeen aragtidooda qodobada iyo faqradaha u baahan wax ka beddel iyo toosin, kuwa kalana lala akhriyo Dastuurka KMG ah ee dalka.

Ugu danbayn Guddoomiye Timacadde oo kulanka soo xiray ayaa bogaadiyay doodda Sanatarrada ay maalmahihii la soo dhaafay ka yeesheen wax ka beddelka Xee-hoosaadka Aqalka Sare, wuxuuna faray xubnaha guddiga Xeer-hoosaadka in ay soo qaabeen aragdida Sanatarradu ay ka dhiibteen wax ka beddelka Xeer-hoosaadka.

Guddiga Arimaha Gudaha Dib-Uheshiisinta Arimaha Federaalka iyo Xiriirka dowladaha xubnaha ka ah dowladda Federaalka Soomaaliya, ayaa maanta yeeshay kulankoodii shanaad ee kalfadhiga shanaad.

Kulanka oo ay shir guddominaysay Guddoomiyaha Guddiga Sanatar Deeqa Xasan Xuseen ayay xubnaha guddigu waxa ay ka tashadeen howlohooda shaqo gaar ahaan safar shaqo ay ku tegi rabaan magaalada Kismaayo ee xarunta KMG ah ee Dowlad Jubanland.

Guddiga waxey hore safaro shaqo ugu tageen magaalda Baydhabo ee xarunta KMG ah ee Dowlad Gobaleedka Koofur Galbeed iyagoo kulamo miro-dhal ah la soo qaatay madaxda maamulkaas oo ugu horeyaan Madaxweynaha, Guddoonka Baarlamaanka,Wasaaradda Arrimaha Gudaah iyo qaybaha kale ee bulshada, waxay sidoo kale halkaas kula wareegeen xafiis matalaad oo loogu talagalay Aqalka Sare.

Ku-simaha Guddoomiyaha ahna Guddoomiye ku xigeenka koowaad ee Aqalka Sare, Mudane Cali Shacbaan braahim oo uu weheliyay Guddoomiye ku xigeenka labaad, Mudane Cabdullaahi Cali Xersi (Timacadde), ayaa maanta shir guddoomiyay kulanka shanaad ee kalfadhiga 5-aad guddiga joogtada Aqalka Sare ee Baarlamaanka 11-aad.

Ajandaha kulanka maanta ayaa ahaa dhagaysiga warbixinta guddiga maaliyadda oo safar shaqo ku tegay magaalada Nayroobi iyadoo guddoomiye ku xigeenka Guddiga Maaliyadda Aqalka Sare Sanatar Ibraahim Owgaab Cismaan, uu warbixin faahfaahsan oo ku saabsan safarkaas uu siiyay xubnaha Guddiga Joogtada ah ee Aqalka Sare BJFS.

Sidoo kale xoghaya guud ee Aqalka Sare Mudane Cabdinaasir Ibraahim Guuleed ayaa dhankiisa Guddoonka iyo xubnaha guddiga joogtada ah la wadaagay shuruucda golaha soo gaartay ee u diyaarsan ka waajib gudashada Golaha Aqalka Sare.

Intaas ka dib Guddoonka iyo xubnaha guddiga joogtada ah ayaa dood iyo falanqayn dheer ka yeeshay dardar gelinta waajibaadka ka saran korjoogtaynta, isla-xisaabtanka hay’adaha dowladda iyo arrimaha kale ee hortabinta u leh waajibaadka Aqalka Sare ee Baarlamaanka 11-aad.

Guddiga Khayraadka Qaranka, kaabayaasha Dhaqaalaha iyo Gaadiidka Aqalka Sare, oo gudnaya waajibaadka ka saran korjoogtaynta iyo la xisaabtanka hay’adaha dowladda ayaa maanta xafiiskooda ugu yeeray Wasiirka Wasaaradda Gaadiidka iyo Duulista Hawada Xukuumadda Federaalka Soomaaliya Fardowsa Cismaan Cigaal iyo xubno kale oo la socday.

Kulanka oo ay shir guddoominaysay Guddoomiyaha guddiga Khayraadka Qaranka Sanatar Saynab Ismaaciil Maxamed, ayaa ugu horrayn wasiir Fardowsa looga dhagaystay warbixin guud oo ku saabsan howlaha Wasaaradda, waxyaabaha u qabsoomay iyo shaqooyinka kale ee hortebinta u leh Wasaaradda.

Intaas kadib xubnaha Khayraadka Qaranka, kaabayaasha Dhaqaalaha iyo Gaadiidka Aqalka Sare, ayaa Wasiirka iyo Wasiir dowlaha Wasaaradda Gaadiidka iyo Duulista Hawada, wax ka waydiiy cabashooyin guddiga ka soogaaray ganacsatada iyo shacabka oo ay ka mid ahaayeen tayada iyo badqabka gaadiidka waawayn ee xamuulka qaada, gaadiid ku xayirad Dekedda, cabashada wadayaasha Mooto Bajaajta iyo su’aalo kale oo muhiim ahaa, kuwaas oo ay mid mid uga jawaabeen Wasiirka iyo wasiir dowlaha Wasaaradda Gaadiidka iyo Duulista Hawada Xukuumadda Federaalka Soomaaliya.

Ku-simaha Guddoomiyaha ahna Guddoomiye ku xigeenka koowaad ee Aqalka Sare, Mudane Cali Shacbaan braahim oo uu weheliyay Guddoomiye ku xigeenka labaad, Mudane Cabdullaahi Cali Xersi (Timacadde), ayaa maanta shir guddoomiyay kalfadhiga shanaad kulankiisa 12-aad Aqalka Sare ee Baarlamaanka Jamhuuriyadda Federaalka Soomaaliya.

Ajandaha kulanka ayaa ahaa Akhrinta koowaad ee hindise sharciyeedka xeerka shaqada Soomaaliya iyo Soojeedinta la xiriirta arrimaha shaqada dowladaha xubnaha ka ah dowladda Federaalka iyo Aqalka Sare.

Ugu horrayn Wasiirka Wasaaradda shaqada iyo arrimaha Bulshada Xukuumadda Federaalka Soomaaliya Mudane Maxamed Cilmi Ibraahim, ayaa Sanatarrada Aqalka Sare u faahfaahiyay muhiimiyadda sharciga xeerka shaqada Soomaaliya, sababta keentay in dib u eegis lagu sameeyo iyo bahida loo qabo waqtigaan.

Intaas kadib Sanatarrada Aqalka Sare ayaa gudagalay dood waqti dheer qaadatay oo ku saabsanayd doorkooda matalaad ee arrimaha shaqada, dowladaha xubnaha ka ah dowladda Federaalka Soomaaliya, waxayna soo jeediyeen talooyin, dhaliilo iyo aragtiyo kala duwan oo wax ku ool ah, iyagoo tilmaamay in la raaco qodobada ay xeeriyen xeer-hoosaadka Aqalka Sare iyo Dastuurka KMH ah ee dalka, si ay u gutaan waajibaadkooda shaqo.